Leta y’u Bufaransa yamaganye umutwe wa M23, nyuma yo kubura imirwano n’ihuriro ry’ingabo za Leta ya Repubulika Iharanira Demokarasi ya Congo yasize winjiye muri Teritwari ya Walikale.
Kuva ku Cyumweru gishize ni bwo imirwano yagati ya M23 n’ingabo za Leta ya Congo yatangiye muri iriya Teritwari.
Ku Cyumweru gishize M23 yigaruriye agace ka Kalembe yaje gutakaza nyuma y’umunsi umwe, ariko yongera kukisubiza hadaciye kabiri.
Ibi biri mu byatumye u Bufaransa bwamagana uriya mutwe.
Paris biciye muri Minisiteri y’Ububanyi n’Amahanga yayo yamaganye M23 ku bwo kubura imirwano, iyisaba kubahiriza agahenge kemerejwe i Luanda.
U Bufaransa bwagize buti: “U Bufaransa buramagana ugukomeza ibitero kwa M23. Agahenge kagikomeje kemeranyijweho biciye mu biganiro bya Luanda gakwiye kubahirizwa. U Bufaransa burashimangira ko bushyigikiye ibiganiro bya Luanda mu gushaka umuti w’amakimbirane arambye”.
U Bufaransa kandi bwagaragaje ko bushyigikiye ukutavogerwa k’ubusugire bwa Repubulika Iharanira Demokarasi ya Congo, busaba imitwe intwaro ikorera muri iki gihugu guhagarika imirwano.
U Bufaransa burashinja M23 kuba nyirabayazana y’ibitero, mu gihe uyu mutwe uvuga ko ingabo za Leta ari zo ziba zabanje kuwutera.
Ku wa Gatanu tariki ya 25 Kanama amakuru avuga ko M23 yiriwe irasa umusozi wa Bitonge uherereye muri Kalembe, mu rwego rwo kuwirukanaho abarwanyi b’imitwe ya Wazalendo bari bari hejuru yawo.
INKURU YA TUYISHIME Eric
